Föstudagur 16.06.2017 - 17:17 - Ummæli ()

Síðasti leiðtoginn sem mundi hörmungar heimsstyrjaldarinnar

Þegar Helmut Kohl tók við embætti kanslara Vestur-Þýskalands 1982 var ekki búist við miklu. Hann þótti frekar stirðbusalegur og seinn að hugsa miðað við hina leiftrandi forvera sína, Willy Brandt og Helmut Schmidt. Það átti enginn von á að Kohl myndi sitja í sextán ár – kannski fulllengi – og verða sá kanslari sem hefur setið lengst ef undan er skilinn sjálfur Bismarck.

Kohl er síðastur leiðtoga Evrópu sem fellur frá og mundi síðari heimsstyrjöldina. Þetta mótaði allan feril Kohls og gerði hann að eindregnum Evrópusinna. Hann var unglingur þegar hann var boðaður í herinn 1945 en slapp við að þurfa að berjast, þakkaði það þeirri náð að hafa fæðst seint. Gnade der späten Geburt – voru orð hans. Heimabær hans, Ludwigshafen í Rínarlöndum, var sprengdur í tætlur í stríðinu.

Einn kjarninn í stefnu Kohls var náið samband við Frakkland og þeir Francois Mitterrand bundust vinarböndum, þótt þeir kæmu úr ólíkum stjórnmálahreyfingum. Kohl var kaþólskur og var í flokki Kristilegra demókrata. Þeir voru sérstakir saman, Kohl var 1.93 á hæð og þrekinn, Mitterrand var pínulítill, mjór og veiklulegur. Nú vona margir að aftur verði hægt að endurvekja samband Þýskalands og Frakklands eins og það var á þessum tíma.

Stærsta stund Kohls var sameining þýsku ríkjanna. Hann varð kanslari sameinaðs Þýskalands. Margir töldu að óráð væri að sameina ríkin svo hratt, en Kohl skildi að ekki var hægt að bíða. Sameiningin varð innan við ári eftir að Múrinn féll.

Tilkynnt var um lát Helmuts Kohl í dag. Hann var 87 ára.

 

Francois Mitterrand og Helmut Kohl haldast í hendur í Verdun þar sem Frakkar og Þjóðverjar börðust í fyrri heimsstyrjöldinni.

 

«
»

Ummæli ()

Vinsamlegast athugið:
Ummæli eru á ábyrgð þeirra sem þau skrifa. Eyjan áskilur sér þó rétt til að fjarlægja óviðeigandi og meiðandi ummæli. Tilkynna má óviðeigandi ummæli í netfangið ritstjorn@eyjan.is

Frjáls fjölmiðlun ehf. - Kringlunni 4-12, Reykjavík - eyjan (hjá) eyjan.is