Miðvikudagur 09.08.2017 - 03:38 - Ummæli ()

Lífeyrissjóðirnir verða að fjárfesta sem víðast um heiminn og í sem margvíslegastri starfsemi

Gengi Haga hríðfellur. Á þessum lista getum við séð hverjir eru helstu eigendur þessa félags sem hefur sent frá sér tvær afkomuviðvaranir að undanförnu. Þetta eru mestanpart lífeyrissjóðir sem eru í eigu launafólks. Sumir lífeyrissjóðanna eiga meira að segja stóra hluti.

Það eru semsagt þeir sem greiða í lífeyrissjóði sem tapa. Á sama tíma er verið að hækka iðgjöld í lífeyrissjóðina – og ljóst að aldur til lífeyristöku mun fara hækkandi.

En þetta er sterk áminning um að það er brjálsemi að íslensku lífeyrissjóðirnir, sem bólgna af fé í hverjum mánuði, séu að fjárfesta mikið á Íslandi. Eina skynsamlega leiðin til að ávaxta þessa fjármuni er að dreifa þeim nógu víða um heiminn og í alls konar starfsemi. Að binda peningana við fá íslensk fyrirtæki sem eiga það jafnvel til að hækka úr öllu valdi einmitt vegna fjárfestinga lífeyrissjóðanna er einfaldlega vond meðferð á fé almennings. Jú, þannig er hægt að sýna fram á hækkandi virði – en það er eins og að pissa í skóinn sinn. Þetta var eitt af því sem við lærðum á tíma hrunsins – og það er alveg ljóst að við getum átt von á nýju bakslagi.

Svo má minna á að stjórnendur Haga voru sjálfir að selja hluti sína í fyrirtækinu í fyrrra, eftir að ljóst var að Costco kæmi hér inn á markaðinn.

 

«
»

Ummæli ()

Vinsamlegast athugið:
Ummæli eru á ábyrgð þeirra sem þau skrifa. Eyjan áskilur sér þó rétt til að fjarlægja óviðeigandi og meiðandi ummæli. Tilkynna má óviðeigandi ummæli í netfangið ritstjorn@eyjan.is

Eyjan Media ehf. - Kringlunni 4-12, Reykjavík - eyjan (hjá) eyjan.is