Þriðjudagur 19.09.2017 - 07:50 - Ummæli ()

Miðjan skreppur saman – pattstaða?

Sæmkvæmt skoðanakönnuninni sem birtist í Fréttablaðinu í dag eiga þrír flokkar, sem eru á miðjunni eða nærri henni, á hættu að þurrkast út. Þetta eru Samfylkingin, Björt framtíð og Viðreisn. Allir með fylgi á bilinu 5-7 prósent.

Annars virðist stefna í pattstöðu þar sem jafn erfitt – eða erfiðara – verður að mynda ríkisstjórn en síðast. Það hjálpar varla að samkvæmt könnuninni eru átta flokkar á þingi. Fylgi Sjálfstæðisflokksins er lélegt í könnuninni og Vinstri græn eru jafnstór þeim. Tveggja flokka stjórn sem Bjarni Benediktsson lætur sig dreyma um er eins og fjarlægur draumur en stjórn þriggja flokka með VG og einum flokki til er möguleg. Það virðist þó ekki sérlega raunhæft – VG fer seint í slíkan leiðangur.

Samkvæmt þessu eru einu flokkarnir sem uppskera í kosningunum VG og Flokkur fólksins sem í könnuninni kemur stormandi inn með 11 prósenta fylgi og 7 þingmenn. Framsókn og Píratar halda sínu, en hvorugur flokkur var sérlega ánægður með úrslitin síðast.

Vinstri stjórn er ekki möguleg samkvæmt könnuninni nema þá með Framsókn og/eða Flokk fólksins innanborðs.

En kosningabaráttan er auðvitað ekki byrjuð og spurning um hvað verður í raun kosið? Sjálfstæðisflokkurinn boðar staðfestu og svo eru flokkar sem tala um gegnsæi. En Flokkur fólksins talar um aldraða og öryrkja og fátækt fólk – og spurning hvort hann gefi ekki tóninn að einhverju leyti?

 

«
»

Ummæli ()

Vinsamlegast athugið:
Ummæli eru á ábyrgð þeirra sem þau skrifa. Eyjan áskilur sér þó rétt til að fjarlægja óviðeigandi og meiðandi ummæli. Tilkynna má óviðeigandi ummæli í netfangið ritstjorn@eyjan.is

Eyjan Media ehf. - Kringlunni 4-12, Reykjavík - eyjan (hjá) eyjan.is