Miðvikudagur 08.11.2017 - 07:57 - Ummæli ()

Eitt ár frá kjöri Trumps – lýðskrumarinn sem tekst ekki að gera Bandaríkin mikil á ný

Í dag er Trumpdagurinn, það er liðið ár síðan Donald Trump náði kjöri sem forseti Bandaríkjanna. Slagorð hans var Make America Great Again. Það hefur farið á annan veg, manni finnst eins og Bandaríkin sökkvi æ dýpra ofan í díki misskiptingar, ofbeldis, óraunveruleika og rugls.

Stjórnkerfið Bandaríska hefur að nokkru leyti haft hemil á Trump. Hann hefur komið fáum af stefnumálum sínum í framkvæmd, virkar afar veiklaður sem forseti, en þess ber að gæta að hann er alveg jafn óútreiknanlegur og fyrr, þetta er maður með alvarlegan sjálfsmyndarvanda, og næstu þrjú ár í forsetaembætti með hann geta orðið löng og ströng.

Trump í Hvíta húsinu fer líka langleiðina með að normalísera harðstjóra eins og Vladimir Pútín og Xi Jinping. Þeir virka nánast eins og ljós skynseminnar miðað við Trump. Það er ekki gott.

Og þótt Trump kunni að virðast bæði hjákátlegur og lemstraður þá hefur hann ennþá feikilega mikil völd. Því má til dæmis ekki gleyma að það er miklu auðveldara fyrir forseta Bandaríkjanna að ýta á rauða hnappinn og hefja kjarnorkustríð en að koma í gegn breytingum á heilbrigðiskerfinu.

Annað má nefna, en það er hvernig aðferðir Trumps eru notaðar í stjórnmálum víða um heim og það með talsverðum árangri. Við erum ekki búin að bíta úr nálinni með þennan gaur, það eru eftir þrjú löng ár – að minnsta kosti.

 

«
»

Ummæli ()

Vinsamlegast athugið:
Ummæli eru á ábyrgð þeirra sem þau skrifa. Eyjan áskilur sér þó rétt til að fjarlægja óviðeigandi og meiðandi ummæli. Tilkynna má óviðeigandi ummæli í netfangið ritstjorn@eyjan.is

Frjáls fjölmiðlun ehf. - Kringlunni 4-12, Reykjavík - eyjan (hjá) eyjan.is