Miðvikudagur 06.12.2017 - 08:39 - Ummæli ()

Fljúgandi start hjá ríkisstjórninni

Ég spáði því þegar unnið var að myndun ríkisstjórnarinnar að hún myndi fá mikinn meðbyr í upphafi. Nefndi 70 prósenta fylgi. Það er hærra í könnun Fréttablaðsins sem birtist í dag – 78 prósent. Ég hitti fólk sem var mjög hissa þegar ég sagði þetta.

Það var talað um ríkisstjórnina sem „pólitískt sjálfsmorð“ fyrir Vinstri græn og um „læmingjaleiðangur“. Margir gengu að því sem vísu að flokkurinn myndi fá hrikalega útreið fyrir að taka upp samstarf við Sjálfstæðisflokkinn. En fylgið hækkar þvert á móti, flokkurinn er með 23,5 prósent í skoðanakönnuninni. (Samfylkingin með 13 prósent.)

Á þessu eru ýmsar skýringar. Kannski fyrst og fremst að fólk er til í að gefa þessu stjórnarmyndstri „séns“ eftir langt róstuskeið í stjórnmálunum. Maður skynjar útbreidda löngun eftir einhvers konar sátt – að stjórnmálamenn komi sér saman um að vinna að verkefnum sem flestir eru sammála um að séu brýn.

Það má heldur ekki vanmeta hlut Katrínar Jakobsdóttur. Hún er feikilega vinsæl, vinsældir hennar ná yfir nánast allt litróf stjórnmálanna. Einlægt fas hennar vekur traust.Það verður líka að segjast eins og er að hún hefur haldið geysilega vel á málum – hún kemur fram af festu og öryggi án þess að tapa sínum eðlislæga sjarma. Það er spennandi að sjá hana í þessu hlutverki.

Auðvitað getur fjarað fljótt undan ríkisstjórn í því pólítíska árferði sem við höfum nú. Það gerðist hratt í tilviki síðustu fjögurra ríkisstjórna. En samt verður að segja, þetta er fljúgandi start hjá ríkisstjórninni.

 

 

Hér er svo línurit frá Gallup sem sýnir fylgi ríkisstjórna frá því 2007. Við sjáum hversu sáralítið fylgi stjórn Sjálfstæðisflokks, Bjartrar framtíðar og Viðreisnar hafði allt frá upphafi. Sú stjórn sem mest hefur fylgið í byrjun er stjórn Sjálfstæðisflokks og Samfylkingar. Það vill gleymast hversu vinsæl hún var fyrst. Svo kom náttúrlega hrun og stuðningurinn við hana gufaði upp. Það er hins vegar lífseig þjóðsaga að Samfylkingin hafi farið sérstaklega illa út úr þeirri stjórn. Það gerði hún ekki, Fylgið byrjaði að hrynja af henni þegar nokkuð var farið að líða á tíma Jóhönnustjórnarinnar. Eins og sjá má hafði hún álíka mikið fylgi í upphafi og stjórn Sigmundar Davíðs.

 

 

«
»

Ummæli ()

Vinsamlegast athugið:
Ummæli eru á ábyrgð þeirra sem þau skrifa. Eyjan áskilur sér þó rétt til að fjarlægja óviðeigandi og meiðandi ummæli. Tilkynna má óviðeigandi ummæli í netfangið ritstjorn@eyjan.is

Frjáls fjölmiðlun ehf. - Kringlunni 4-12, Reykjavík - eyjan (hjá) eyjan.is