Miðvikudagur 06.12.2017 - 00:35 - Ummæli ()

Jólalegur Skólavörðustígur 1988 (og smá um göngugötur)

Þetta er frábærlega jólaleg mynd af Skólavörðustígnum eins og hann leit út fyrir um það bil 30 árum. Myndinni var deilt af Pétri P. Johnson á vefnum Gamlar ljósmyndir og segir þar að hún sé tekin 1988. Manni finnst ekki svo ýkja langt síðan en gatan er mikið breytt frá því þarna er. Þeir sem þekkja árgerðir bíla geta kannski ráðið í ártalið.

Lágreistu gömlu húsin standa enn hægra megin götunnar, þar á meðal Bergshús þar sem Þórbergur leigði á tíma Ofvitans. Þar var leikfangabúð. Pétur rakari er enn á sínum stað og svo Gjafahúsið þar sem voru seldar bastkörfur, krukkur og krúsir og alls kyns varningur. Húsin sem þarna komu í staðinn munu seint fá einhver fegurðar- eða hönnunarverðlaun.

Tösku- og hanskabúðin er á horninu gengt Tukthúsinu – það er reyndar ekki langt síðan hún flutti upp á Hlemm. Aðeins ofar er svo vefnaðarvöruverslunin Vogue með sínum auðþekktu skærum utan á.

Það er ró og friður á myndinni, ekki hræða á ferli. Hún er líklega tekin að næturlagi eða á sjálfum jólunum. Rauðu ljósaseríurnar sem ná alla leið upp að kirkjunni eru býsna hátíðlegar.

Það er deilt um takmarkanir á bílaumferð á Skólavörðustíg. Sumir verslunareigendur eru ósáttir við að götunni sé lokað í marga daga fyrir jólin. Það verður að segjast eins og er að jólaverslun Íslendinga í Miðbænum er sáralítil núorðið. En í raun væri mest ástæða til að loka Skólavörðustígnum efst, næst Hallgrímskirkju og tengja þá við torgið fyrir framan kirkjuna. Þar er langflest fólkið á ferli. Kirkjan er vinsælasti viðkomustaður túrista í bænum. En þar eru bílar líka að troðast innan um ferðamennina, og þar að auki tvær akgreinar og bílastæði báðum megin.

Kannski samræmist það ekki umferðarskipulagi að loka þarna efst í götunni, en í raun er það nokkurt hálfkák að loka bara neðsta partinum. Máski mætti hugsa sér að allur Skólavörðustígurinn yrði göngugata, en það verður þá að gera almennilega, ekki bara með því að loka hippsum happs. Þá þyrfti að breyta götunni, gera hana meira aðlaðandi, svo þetta sé ekki bara bílagata læst með hliði og ótútlegum steinsteyptum blómapottum sem eru settir þarna niður á sumrin.

 

 

«
»

Ummæli ()

Vinsamlegast athugið:
Ummæli eru á ábyrgð þeirra sem þau skrifa. Eyjan áskilur sér þó rétt til að fjarlægja óviðeigandi og meiðandi ummæli. Tilkynna má óviðeigandi ummæli í netfangið ritstjorn@eyjan.is

Frjáls fjölmiðlun ehf. - Kringlunni 4-12, Reykjavík - eyjan (hjá) eyjan.is